Акъатна гад, чими ракъар багъишай,
Йисан вахтар т1ебиатдин суьрет я.
Акваз-такваз дагъдин къамат дегишай
Къайи шагьвар, яд-къарасу — девлет я.
Алукьна…Акъатна гад, чими ракъар багъишай,
Йисан вахтар т1ебиатдин суьрет я.
Акваз-такваз дагъдин къамат дегишай
Къайи шагьвар, яд-къарасу — девлет я.
Алукьна зул – къизилдин ранг лишан тир,
Таму-тара дегишарна либасни.
Кьезил шагьвар, чуьлда авай хуп1 атир,
Пеш гадариз кьулухъ тушир са тазни.
Чуьлда цанвай ник1ер хуьруьн колхозди, —
Гатун зегьмет, — к1ват1на вири куьмекдив.
Вахтар хьанва ник1ер, багълар, салазни
Перер ягъиз, гъарар гудай гьуьрметдив.
Гагь чигеди, гагь марфади арабир
Дамахдивди рагъ цифедив к1евирда.
Накь чим гайи хъуьтуьл гьава, адан сир
Къе къуза яз яйлах тирвал къекъуьрда.
Са вахтара дагъдин кьиляй – цаварай,
Гьалтда лацу дурнаяр са ц1ар хьана.
Зулун мекьи гьавади хуп1 ахварай
Авудна чеб рекье тунвай т1ар хьана.
Зулун йикъар – чуьлдин гуьзел акунар,
Сад-садалай аквадачни гуьрчег яз!
Яд кужумна кьеженвай пеш – ви гьунар
Перишандиз аквада вун керчек яз.
