А.С.Пушкин табасаран чIалниинди
«Я Вас любил…»
***
Уву ккунди гъахьниз: белки, мюгьюббат
Бегьем…А.С.Пушкин табасаран чIалниинди
«Я Вас любил…»
***
Уву ккунди гъахьниз: белки, мюгьюббат
Бегьем ктIубшвнура даршул гевюлиъ йиз;
Анжагъ увук диди гъалаб ктрипри зат;
Уву сефил шлубси дубхьну ккундариз.
Уву ккундийзуз жиниди, миж ктарди,
Гагь начу, гагь шаклували ургури;
Гьаци марцци кIваан, гьаци назукди,
Я аллагь, ккун апIри уву жарари.
«Кобылица молодая…»
***
Тюнт гъиллигънан жигьил хвар,
Къавкъаз тIагъмайин намус,
Наана ккипнава жвар?
Явра вахт хъубкьна гьамус;
ГучI кадиси ул миван,
ЧIилкIар ярхлаз мазарган,
ГьатIабццу сакIал чюлиъ
Ккуниганси мажабгъан.
Яваш: узу элеъну,
Гъибтдизаву мютIюгъ хьуз
Ва, фури жикъи дапIну,
Йиз уьлчмейиъ чарх йивуз.
«Храни меня, мой талисман…»
***
Узу уьрх, йиз марцци гьякал,
Уьрх, уз`ин илигънайиган,
Гъалаб кайи вахна швумал
Уву тувниз дердлу йигъан.
Океанди чархнаъ тIаъган,
Узлан илбицну лепдин цал,
Дифарикан турфан хьиган,-
Узу уьрх, йиз марцци гьякал.
Яд юрдариъ ялгъуз хьиган,
ТIагъру сакитвалиъ ахъган,
Пис женгнан гъурхуйигъ гъяхъган,
Узу уьрх, йиз марцци гьякал.
КIваз гирами ширин кучIал,
Рюгьназ сюгьрин акв туврай хяд
Жасус гъабхьну, гъабхьну кьягьят…
Узу уьрх, йиз марцци гьякал.
Гъубшубдикан дуфну хиял,
Зийнар чIиви дарапIри зат.
Гежехайир миж; абх мурад;
Узу уьрх, йиз марцци гьякал.
«Если жизнь тебя обманет…»
***
Уьмри кучIлар гъапIиш увуз,
Хажалатар, дердер мапIан!
Сабурлу йихь пашман йигъан:
Хъугъ , шадвалин йигъ ими гъюз.
ЮкIв ади шул гележегдиъ;
Гъийинуб гьибгъру пашманди:
Вари улдубчIвну гъябгъиди,
Гъубшуб хъасин кIваз хуш хьибди.
